Rita Skinnebach Hansen
Kinaavunga, peroriartorneralu
Rita-mik ateqarpunga, 31-inillu ukioqarlunga, danmarkimili najungaqarlunga uingalu, uimalu pania qimmerpullu.
Illoqarfeeqqami illoqarpugut, nutarterujuukkatsinnik. Peroriartorpunga Qasigiannguani, – aanaa aataakkunni, anaananga angajungalu Malu, peqatigalugit.
Peroriartorninni nuannersorpassuit eqqaamavakka, soorlu pupartilluta aneernerit – aasakkut unnuaaruttuusilluta arsarnerit il.il.
Illuatungaani peroriartorninni amingaatiginikuusimavara ataataq, tassanili aatama taanna rolleq ‘tingulluarpaa’. Taannalu eqqaatillugu, annikittumik eqqaasinnaavara uanga sianiuteqarfinni assut malunnaateqarsimavoq ataatamiit qimataasimaneq, ukiorpassuarnilu timinni taanna ‘suliarisimallungu’.
Suli maannakkumut tassanngaanniit tunngaveqartumiit ersiutinik qisuariaatsinik malugisaqartarpunga, allaanerussutaali massakkut inersimasutut akisussaaffeqarlunga – ilisimasaqarluarlunga, nalunangu qaqugukkut ‘meerartara’ (sianiuteqarfinga) ikittarnersoq, peqqutaalu.
Peroriartorninni allaanerulaartutut misigiuaannarnikuuvunga, misigissuseqartorujuk malussarissoq meeraq/inuusuttoq. Eqqaamavara oqarfigitittuaannarnikuullunga; arrajakisarit! Nalilerneqartarluni arrajaneq (malussarinneq – misikkarinneq) ajortutut. Immaqa amerlasuut tamanna ilisarisinnaavaat. Eqqaapallassuaralu; ‘arrajaneq’ – misikkarinneq – malussarinneq, ajortuunnginnerpaavoq – inissaminiippoq, aallaaveqarpoq – PAASINARNERPAAVOQ, timeq sianiuteqarfik paasisaqarfigileraanni.
Misikkarinneq, malussarinneq, ‘arrajaneq’ – uanni annanniaataasimavoq (tunissutaanerpaallunilu!) qimatseqqinneq tunngaviusumik ersinginerani. Frygten for at blive forladt igen. Taannalu suli takkussinnaasarpoq, nalunngilarali maannakkut qanoq tussassanerlunga, timera sianiuteqarfinga paasitillugu – qimataalinngittugut.
Aappariinnitsi tamanna aamma ersertaqaaq, parterapeernikkulli namminerlu terapeernermi sapinngisamik ’suliarisarpagut’. Illuatungaanili misikkarinneq malussarinneq uannut aamma tunissuterujussuuvoq, inuuneq inoqatikkalu itisuumik malugisarakkit attaveqarfigisarakkit – taannalu qujamasuutigisarpara assut, kinaassusinnut tamanna ilaammat.